S’ka Kupë për fituesit e Ligave Unike

Basketbollistët e rinj të Bashkimit, gjenerata U16, pas triumfit ndaj bashkëmoshatarëve të Yllit kanë fituar Ligën Unike U16 dhe kanë siguruar Superligën U16 për sezonin tjetër.

Mirëpo, ata kanë qenë të befasuar pasi që, pas triumfit në finale të PlayOffit të kësaj lige - nuk ka pasur as trofe as medalje për ekipin!

Në anën tjetër, Federata e Basketbollit të Kosovës në një përgjigje të dërguar redakisë sonë pas pyetjes lidhur me këtë rast ka thënë se nuk ka Kupë për këto gjenerata, pasi që ata luftojnë për tu futur në Superligat përkatëse.

“Nuk ka Kupë dhe medalje për U16 dhe U 18 të Ligës Unike. Ekipet luftojnë për të siguruar një vend në Superligë U16 dhe U18,” ka thënë për TopSporti.com sekretarja e përgjithshme e FBK-së, Elvira Dushku.

Në Propozicione të Garave për Ligën Unike nuk është precizuar dhënia e trofeut. Aty shkruan se ekipet finaliste nga sezoni i ardhshëm do të jenë pjesë e Superligës U16.

“Kampioni i Ligës Unike shpallet ekipi që arrin 2 fitore nga maksimumi 3 ndeshje të zhvilluara dhe dy ekipet finaliste nga edicioni i ardhshëm do të jenë pjesë e Superligës U16,” shkruan në Paragrafin e kësaj lige të Propozicionit që tregon rregullat për këto liga të grupmoshave.

Në anën tjetër, edhe kampioni i Ligës Unike U18, Rahoveci, nuk ka marrë trofe pas triumfit në këtë ligë.

Ata janë kualifikuar për Superligën Unike U18 sezonin e ardhshëm.

TopSporti.com ka mësuar se ekipi i vreshtarëve ka blerë Kupën vullnetarisht pasi që fitoi finalen, për të dalë fotografi basketbollistët e rinj të skuadrës me trofe pas triumfit në finale të PlayOffit.