Stadiumi legjendar Maracana, do të merr emrin e legjendës

Stadiumi ikonik i Brazilit, Maracana, do ta ndërrojë emrin. BBC ka bërë të ditur se stadiumi pritet të merr votat e nevojshme nga legjislatura e Rio De Janeiros për të marrë emrin e ri: Edson Arantes do Nascimento - Rei PELE stadium.

Edson Arantes do Nascimento - është emri i plotë i legjendës braziliane dhe botërore të futbollit, Pele. Ndërsa Rei ka kuptimin e mbretit.

“Rei Pele” ka shënuar golin e 1000-të të tij në këtë stadium, ndërsa Maracana ka qenë nikoqire e finaleve të Botërorit 1950, 2014 dhe ceremonisë së hapjes së Olimpiadës 2016.

Mbi 200 mijë persona janë raportuar të kenë qenë prezent në finalen e vitit 1950 aty, kur Brazili kishte humbur finalen nga Uruguaji. Tash kapaciteti i stadiumit është 78 mijë e 838 ulëse.

Emri i parë i stadiumit ka qenë Mario Filho, një gazetar që ka lobuar pandalë për ndërtimin e këtij stadiumi në vitet 1940, por më pas mori emrin Maracana, sipas lokacionit ku gjendej.