Super Armando Broja, Shqipëria me meritë mposhtë Hungarinë

Pas humbjes ndaj Polonisë në Varshavë, Shqipëria ka shënuar një fitore mjaft të rëndësishme ndaj Hungarisë në Elbasan sonte.

Takimi që është i vlefshëm për fazën kualifikuese drejt Botërorit të Katarit përfundoi 1-0 për Shqipërinë, e hero i kombëtares sonte ishte Armando Broja, i cili u inkuadrua nga banka rezervë në minutën e 78’ dhe shënoi në minutën e 87’.

Rastet më të mira për shënim në pjesën e parë u shfaqën për Shqipërinë. Fillimisht me një goditje me kokë rrezikoi Ardian Ismajli në minutën e 13’, më pas Myrto Uzuni gjuajti me të djathtën jashtë në minutën e 15’, e pas tij Nedim Bajrami rrezikoi me një gjuajtje nga distanca në minutën e 29’. Për këtë të fundit kjo ishte ndeshja debutuese me fanellën e Shqipërisë. Kualiteti i tij ra në sy menjëherë.

Mundësitë për shënim vazhduan edhe më tutje për Shqipërinë në pjesën e parë. Më e mira prej tyre u shfaq për Marash Kumbullën, i cili pothuajse me portën e zbrazur nuk arriti ta çojë topin në rrjetë në minutën e 33’ të ndeshjes.

Sa i përket mysafirëve, ata rrezikuan dy herë në pjesën e parë, por asnjëra prej dy goditjeve nuk paraqiti shumë problem për Etrit Berishën.

GRUPET KUALIFIKUESE

Raste të mira për shënim Shqipëria pati edhe në pjesën e dytë dhe fatmirësisht sulmet e vazhdueshme u shpërblyen me gol. Përveç golit të fitores, që u shënua nga i inkuadruari Armando Broja në minutën e 87’, për t’u veçuar nga pjesa e dytë janë një rast i shfaqur për Bekim Balajn, i cili gjuajti jashtë me të majtën, e pas tij rast të mirë pati edhe Endri Çekiçi i inkuadruar nga banka rezervë.

Hungarezët, që gjatë verës patën një Evropian mjaft të mirë në “grupin e vdekjes”, sot nuk treguan shumë. Ishte Shqipëria ajo që luajti më mirë dhe me plot meritë i mori pikët e plota.

Kështu, Shqipëria tashmë ka 9 pikë në Grupin I, e ndeshjen e ardhshme e luan në shtëpi ndaj San Marinos më 8 shtator.