NGA KONFERENCA E SELEKTORIT TË KOSOVËS
Challandes: Të konfirmojmë Gjeorgjinë nesër
4 September, 2021 @19:32
Përzgjedhësi i Kosovës, Bernard Challandes, në konferencën për shtyp para ndeshjes ndaj Greqisë i është përgjigjur mediave në pyetjet e bëra, derisa ndër të tjera ka bërë të ditur se ekipi tash është në moment të mirë dhe mentaliteti ka ndërruar ashtu siç kishte kërkuar para ndeshjes ndaj Gjeorgjisë, për duelet në vijim.
“Ajo ndeshje ka treguar se kemi hyrë në mentalitet tjetër. Kemi ndryshime në punë, në sjellje, në vendosjen taktike, në lëvizjen e futbollistëve në fushë, jashtë saj, u reflektua në fushë gjithçka dhe pas kësaj loja kërkuese e puna e përbashkët sollën fitoren,” ka thënë Challandes.
ORARI I NDESHJEVE dhe TABELA AKTUALE
Do të luaj Milot Rashica në ndeshje? Do të zë vendin e Lirim Kastratit që keni thënë se ka pasur paraqitje të mirë, Zymer Bytyqit?
“Ju kam thënë edhe më parë, nuk jap formacionin startues më parë. Atë e vendosi para ndeshjes. E vërtetë që të gjithë kanë pasur paraqitje të mirë, si Rashani, ashtu edhe Bytyqi, Kastrati, por edhe Miloti nuk e ka problem të qëndrojë në bankën rezervë, ndoshta së paku një pjesë. Por, më duhet të them se Rashani ka pak probleme dhe do të vendosim nesër nëse është plotësisht i gatshëm për lojë. Gjithesesi jam i lumtur që kam kaq shumë opsione për t’i përdorur,” është përgjigjur selektori i Kosovës.
Ardhja e tifozëve në stadium, edhe pse në përqindje tejet të vogël. Çka do të thotë kjo për kombëtaren e Kosovës?
“Këtu, janë shumë me rëndësi tifozët. Natyrisht 10% nuk është njëjtë si stadiumi i plotë, por sidoqoftë besoj se për situatën ku gjindemi do të jenë mjaft. I dëshiroj gjitha më të mirat popullit të Kosovës për situatën ku gjenden (Covid-19) dhe ndoshta futbolli nuk është më i rëndësishmi tani. Por, jam tepër i lumtur që do të kemi edhe atë përkrahje prej 10%,” ka deklaruar zvicerani.
Ai është pyetur edhe për ngarkesën që do të mund të kenë futbollistët për shkak të fillimit të stinorëve në kampionatet futbollistike si dhe tri ndeshjeve të shpejta me kombëtaren.
“Sipas asaj që kam parë në stërvitje, për ndeshjen e radhës shumica janë mirë, janë rigjeneruar dhe besoj që më vështirë do të jetë për ndeshjen e tretë, pasi që do të ketë edhe probleme të kartonëve. Por, gjithsesi të gjithë lojtarët janë gati dhe për këtë janë ftuar, që të zëvendësojnë njëri-tjetrin,” ka theksuar Challandes.
ORARI I NDESHJEVE dhe TABELA AKTUALE
Ndërkaq, duke ditur forcën e Suedisë e Spanjës në grup, a llogaritet Greqia ndër kundërshtarin kryesor për ndeshje, pasi që kërkohet të sigurohet plasmani më i lartë në tabelë?
“A është Greqia ndeshja më e rëndësishme? Ndeshja e radhës është gjithmonë më e rëndësishmja për mua. Për mua kjo ndeshje është shumë e rëndësishme, jo për shkak të rezultatit. Por për shkak të konfirmimit të performancës ndaj Gjeorgjisë. Ata kanë ekip të mirë, lojtarë të mirë, e për ne është me rëndësi të tregohemi në këtë ndeshje. Duhet të mundohemi, të tregojmë lojë të mirë, lojë të fortë, lojë të bukur dhe pas kësaj të shpresojmë në rezultat dhe renditjen tabelare. Por, më e rëndësishmja është të konfirmojmë lojën në Gjeorgji, për të treguar çka mundet Kosova, ky është qëllimi im,” ka thënë në fund përzgjedhësi i Kosovës, për të mbyllur konferencën për shtyp.