Super Prishtina, drejt Uellsit me epërsi tri-golëshe!

Një paraqitje mjaft e mirë dhe një fitore e merituar për Prishtinën ndaj uellsianëve të Connah’s Quay sonte!

Skuadra nga kryeqyteti i Kosovës ndeshjen në fjalë, që ishte e vlefshme për fazën çerekfinale të kualifikimeve drejt UEFA Conference League, e fitoi me rezultat 4-1, për të shkuar kështu në ndeshjen kthyese në Uells me epërsi tri-golëshe.

I pari për prishtinasit shënoi Leotrim Bekteshi, i asistuar nga Xhevdet Shabani, në minutën e 41’, kurse për 2-0 u përkujdes Oto John (53’).

Më pas, mysafirët e ngushtuan rezultatin në 2-1 (75’) përmes golit të Tom Moore, por Prishtina reagoi shpejt.

Fillimisht, ishte mesfushori Endrit Krasniqi ai që në minutën e 78’ e riktheu epërsinë dygolëshe të Prishtinës, e krejt në fund (90+5’) Oto John e gjeti përsëri rrjetën për përfundimtaren 4-1. Kështu, Prishtina ndeshjen kthyese në Uells e nis me epërsi tri-golëshe.

Ndeshja kthyese mes skuadrave luhet më 29 korrik në Uells, e fituesi nga ky duel përballet në gjysmëfinale të fazës kualifikuese me fituesin e duelit Valur vs. Bodo/Glimt.