Superndeshja, para finales

Shorti i Ligës së Kampionëve ka vënë përballë dy gjigantët e futbollit europian, Real Madrid dhe Bayern Munchen, derisa në pjesën tjetër gjysmëfinale do të ndeshen Atletico Madrid dhe Chelsea, që gjithashtu pritet të jetë duel interesant. 

“Lojtarët kanë vetëbesim të madh, edhepse ndaj Bayernit do të jetë shumë ngushtë. Natyrisht, shpresojmë në fitore të Real Madridit dhe ngritjen e La Decimas,” ka thënë përfaqësuesi i klubit madrilen në Nyon sot, Emilio Butragueno. 

Në anën tjetër, kreu i skautëve të Bayernit, Paul Breitner beson në kurorën e trefishtë të ekipit të tij. 

“Ekipi ynë është në situatë të mrekullueshme. Jemi shumë afër të fitojmë kurorën e trefishtë, derisa do të jemi ekipi i parë që do të mbrojmë titullin e Ligës së Kampionëve,” ka thënë Breitner në deklaratën e tij menjëherë pas shortit. 

Real Madrid do të luaj ndeshjen e parë si vendas në Santiago Bernabeu, derisa në përballjet europiane me Bayernin ka bilanc negativ. 

Bayern ka 11 fitore krahas 2 barazimeve dhe 7 fitoreve të Realit në përballjet direkte.