Të gjithë janë të motivuar ndaj nesh

Selektori i Anglisë, Gareth Southgate, në prononcimin e tij për faqen zyrtare të Federatës ka thënë se Anglia ka pasur fat që ka mënjanuar në short disa skuadra shumë të njohura.

Mirëpo, ai ka shtuar se kjo nuk do të thotë që do ta kenë të lehtë kualifikimin. Përkundrazi.

“Ne mënjanuam në short disa ekipe shumë të mëdha. Mirëpo, tash me disa vende më pak të njohura për futboll është tjetër rrezik. Ata janë të tejmotivuar për të arritur rezultat ndaj Anglisë, veçanërisht në ndeshjet tona si mysafir, ku atmosfera do të mund të jetë shumë e nxehtë,” ka thënë Southgate për thefa.com sot.

SHORTI I KUALIFIKIMEVE PËR EURO2020

“Për ne nuk ka asnjë justifikim. Duhet të përgatitemi makismalisht dhe të tregojmë veten në fushë. Kemi kapur momentumin e mirë si ekip dhe këtë duhet vazhduar edhe gjatë kualifikimeve,” ka shtuar selektori i Anglisë.

Anglia përveç Kosovës, me të cilën takohet për herë të parë në histori, do të ketë punë edhe me Çekinë, Malin e Zi dhe me Bullgarinë në Grupin A kualifikues për EURO 2020. Ndeshjet do të luhen prej marsit deri më muajin nëntor të vitit 2019.

Natyrisht, Anglia si njëra ndër ekipet e para që ka arritur Final Fourin e Ligës së Kombeve do të luftojë gjatë qershorit të vitit të ardhshëm edhe për titullin e parë të kësaj gare në histori.