‘Të shkruajmë historinë’

Basketbollisti i Pejës, Drilon Hajrizi, ka parashikuar ndeshje të vështirë ndaj Rilskit në Karagaç, mirëpo ka thënë se ekipi është i gatshëm për të shkruar historinë. 

Në një bisedë me Radio Kosovën, ai ka bërë të ditur se ndeshja e mbrëmshme ka qenë tepër e vështirë, por me një përkushtim të madh, mbrojtje të fortë dhe lojë ekipore, Peja ka arritur fitoren e madhe. 

“Ka qenë ndeshje shumë e vështirë. Ne kemi pasur një të huaj të lënduar, por e deshëm fitoren më shumë, që e treguam në fund. Besoj që në ndeshjen e kthimit, ne do të kemi përveç Shqiponjave edhe përkrahjen e gjithë shqiptarëve,” ka thënë gjatë kësaj bisede Hajrizi. 

“Lojën e ktheu mbrojtja e fortë. Me lojë ekipore i mbrojtëm pikat kyqe të Rilskit, duke shënuar me kundërsulme,” ka shtuar ai duke treguar për rikthimin e Pejës, pas pjesës së parë. 

Kurse, sa i përket ndeshjes së kthimit në Karagaç, mitrovicasi Hajrizi ka thënë se seria e fitoreve të Pejës duhet të vazhdojë. 

“Natyrisht që është vështirë, por ne do të futemi të përgatitur maksimalisht në këtë ndeshje. Kemi kapur një seri pozitive dhe shpresoj të vazhdojmë kështu. Kam thënë edhe më parë se do të shkruajmë historinë dhe tashmë jemi shumë afër kësaj,” ka vazhduar Hajrizi i cili i ka dëshiruar sukeses sonte edhe kundërshtarit në Superligë, Prishtinës, në ndeshje ndaj Kozuvit, duke thënë se kjo do të ishte fitore e gjithë shqiptarëve, po qe se në finale të BIBL do të takoheshin Peja dhe Prishtina.