Trajneri apo bordi drejtues?

​Anulimi i stërvitjes ditën e dielë tek skuadra e Manchester United u konfirmua dje, me Van Gaalin që udhëtoi për në Holandë. Ky udhëtim shtoi edhe më shumë zërat për shkarkimin e tij, mirëpo në fakt asgjë nuk ndodhi, të paktën deri sot.

Sot Louis u rikthye në Manchester dhe mbajti stërvitje të rregullt para ndeshjes me Derbyn, e cila zhvillohet të premten. Kjo shihet edhe në fotot e bëra nga Carringtoni, vendi ku gjendet qendra stërvitore e 20 herë kampionit anglez.

Mirëpo, po qarkullon edhe një lajm tjetër. Thuhet se Van Gaal ka kërkuar dorëheqjen dy herë, fillimisht pas humbjes nga Norwichi në dhjetor dhe së fundi të shtunën pas humbjes me Southamptonin. Louis Van Gaal e ka kuptuar që puna e tij nuk po ecën si duhet dhe në mënyrë profesionale ka kërkuar dorëheqjen. Por është bordi drejues i klubit, në krye me Ed Woodward, që nuk e ka pranuar shkarkimin e holandezit. Arsyet se pse bordi po e mban ende janë të paqarta.

Kjo ka frustruar edhe më tepër fansat e United, duke bërë që t’i mbushin rrjetet sociale me kërkesa për shkarkim jo vetëm të Louis Van Gaalit, por edhe të drejtorit ekzekutiv, i cili sipas tyre nuk po e menaxhon aspak mirë situatën, duke marrë parasysh formën e klubit.

Asgjë konkrete nuk ka ndodhur, mbeten vetëm raporte të tabloideve të ndryshme. Pritet ndonjë konfirmim në ditët në vijim.