Trepça ‘89 s’dorëzohet, me 10 lojtarë ia merr një pikë Gjilanit

Ndonëse ishte me një lojtar më pak për mbi 80 minuta, Trepça ‘89 sot arriti që të dalë e pamposhtur nga takimi me Gjilanin në Mitrovicë.

Takimi në fjalë përfundoi 1-1 (Christian Mba 50’ / Baton Zabërgja 41’), rezultat i cili më shumë i zhgënjen mysafirët, të cilët kishin superioritet numerik për pothuajse gjatë gjithë ndeshjes, me Lulzim Pecin e vendasve që me plot meritë u përjashtua me karton direkt të kuq në minutën e 9’ të ndeshjes.

TABELA AKTUALE

Baton Zabërgja ishte ai që ia dha epërsinë Gjilanit pak para fundit të pjesës së parë. Zabërgja shënoi pas një topi të rikthyer nga portieri vendas, i cili fillimisht e priti gjuajtjen e Solomon.

E barazimi dhe goli i fundit i këtij takimi erdhi në minutën e 50’, kur Christian Mba shënoi për përfundimtaren 1-1.

Vlen të theksohet që për arsye shëndetësore, sot Gjilanit i mungoi kryetrajneri Zekerija Ramadani, që sot përballë e kishte ish-skuadrën e tij që dikur e kishte shpallur kampione të Kosovës.

Rezultati i sotëm bën që mitrovicasit të kenë 11 pikë pas po aq ndeshjeve të luajtura, kurse Gjilani për momentin ka 19 pikë pas 13 takimeve të zhvilluara.