DUELI I BARAZHIT
Trepça’89-Vëllaznimi, lufta për Superligë 2019/20
29 May, 2019 @11:58
Stinori aspak i mirë i Trepçës’89 në Superligë mund t’i kushtojë me rënie, edhe pse llogariten favorit në duelin vendimtar të barazhit ndaj Vëllaznimit.
Mitrovicasit e drejtuar nga Sabit Osmani pas debaklit në finale të Kupës së Kosovës ku pësuan 5-1 nga Feronikeli dhe humbën rastin për të dalë në Evropë, tash e tëra që mund të bëjnë është shpëtimi i stinorit në Superligë, në duelin ndaj ekipit të konsoliduar të Vëllaznimit.
Ndeshja zhvillohet të shtunën më 1 qershor me fillim në ora 16:00 në Fadil Vokrri të Prishtinës, ndërsa fituesi përcaktohet po atë ditë. Pra, nëse ndeshja nuk ka fitues për 90 minuta, luhen vazhdimet e pastaj edhe penalltitë në rast nevoje.
Trepça’89 përfundoi stinorin në vend të nëntë të Superligës 2018/19, ndërsa Vëllaznimi në këtë ndeshje vjen si i katërti në Ligë të Parë 2018/19.
Vëllaznimi në anën tjetër siguroi disa tre javë para fundit të sezonit vendin për barazh, por humbi një mundësi për tu inkuadruar direkt në Superligë duke u mposhtur nga Istogu si mysafir.
Trajneri i ri i ekipit Blerim Mula ka mbajtur stërvitjet me lojtarët në ditët e fundit dhe ekipi nuk ka njoftuar për mungesa në skuadër për këtë ndeshje.
Përndryshe, Trepça’89 dhe Vëllaznimi këtë stinor janë takuar në gjysmëfinale të Kupës së Kosovës. Trepça’89 kishte fituar ndeshjen e parë në Gjakovë, bindshëm 4-0. Ndërsa në ndeshjen e kthimit Vëllaznimi kishte fituar 1-0 në Mitrovicë.
Sidoqoftë, këto rezultate të Kupës sa mirren parasysh aq edhe mund të krijojnë iluzion, pasi që dihet se duelet e barazhit luhen tepër kujdesshëm dhe pjesa më e madhe e tyre përgjatë viteve të kaluara ka shkuar në vazhdime e penallti.
E aty përveç tjerash, duhet të kesh edhe ndihmën e fatit.