Ulpiana fiton derbin me përmbysje, forcon kreun

Skuadra e Ulpianës ka shënuar një fitore tepër të rëndësishme në kuadër të xhiros së shtatë të Ligës së Parë Grupi B të Kosovës. Ekipi i drejtuar nga Emin Bajrami ka mposhtur skuadrën e Arbrërisë në një fitore, që ka ardhur me përmbysje rezultati në derbin lipjanas.

Kjo është fitorja e katërt radhazi e Ulpianës, që ka hyrë në formë më të mirë në këtë ligë, ndërsa fitorja e arritur sot, ka bërë që ekipi të shpresojë që edhe fundi i stinorit t’i gjejë ata aty.

Ndeshja nisi jo mirë për Ulpianën. Ka qenë Arbëria që mori epërsinë, kur Florent Molliqaj shënoi gol që në minutën e 14 të derbit që luhej në “Sami Kelmendi”.

TABELA AKTUALE

Por, deri në fund të pjesës së parë, Ulpiana është këndellur. Kjo erdhi në saje të Almedin Muratit (39) që me një super-gol, të krijuar vetë nga ai, ka barazuar rezultatin për të shkuar ekipet në pushim, me rezultat të barabartë 1-1!

Derisa pjesa e dytë shkonte drejt fundit të ndeshjes pa gol të shënuar, 10 minuta para fundit të kohës së rregullt në skenë ka dalë Liron Tasholli, që me golin e tij i ka dhënë fitoren e madhe Ulpianës dhe ka sjellë gëzimin e madh në ekip, me 2-1 [Almedin Murati 39, Liron Tasholli 80 — Florent Molliqaj 14] përfundimtare.

Me këtë fitore, Ulpiana ka siguruar vendin e parë për së paku edhe një xhiro, ndërsa ka epërsi 5 pikëshe ndaj përcjellësit të parë, Vushtrrisë, që për momentin ka një ndeshje më pak të zhvilluar.

Në anën tjetër Arbëria ka pësuar humbjen e katërt të stinorit dhe do të kërkojë kthim te fitoret në xhiron tjetër kur pret 2 Korrikun.

Ulpiana ndërkaq luan derbin, ndaj Vushtrrisë dhe atë si mysafir.