Vëllaznimi prezenton dy përforcimet e reja

Jo vetëm skuadrat e Ligës së Parë, por edhe ato të Superligës po e kanë lakminë për skuadrën e Vëllaznimit.

Kjo për arsye se klubi gjakovar nuk po ndalet së përforcuari, me qëllim të aritjes së objektivit kryesor, rikthimit në Superligë.

Vëllaznimi sot ka prezentuar dy përforcimet e reja në konferencën për shtyp.

Mesfushori ofansiv i ardhur nga Vushtrria, Dior Zabërgja, si dhe portieri i ri nga Ferronikeli, Ermal Gashi, janë dy transferet e reja të gjakovarëve.

Ndryshe nga Zabërgja, i cili ka nënshkruar kontratë deri në fund qershor të këtij viti, portieri Gashi do të luajë për Vëllaznimin në formë të huazimit.

Me Zabërgjën dhe Gashin, numri i përforcimeve te Vëllaznimi është rritur në tetë, derisa drejtuesit e klubit kanë bërë të ditur se në ditët në vijim do të ketë edhe përforcime të tjera.