Wenger: Raportet për Sanchezin janë gënjeshtra

Në konferencën për shtyp para ndeshjes së Ligës së Kampionëve ndaj Bayernit, Arsene Wenger, kryetrajner i Arsenalit ka bërë të ditur se të gjitha njoftimet për Alexis Sanchezin të botuara këto dy ditë janë gënjeshtra mediale.

Mediat këto ditë kanë bombarduar Arsenalin lidhur me largimin potencial të Alexis Sanchezit nga ekipi, për shkak të pakënaqësisë me trajnerin.

“Asgjë nuk ka ndodhur. Thjesht ka qenë një vendim imi për një opcion tjetër në ndeshje me Liverpoolin. Edhe këtë e kam bërë të ditur,” ka thënë Wenger sot.

“Po, raportet e botuara këto ditë janë plotësisht fallco. Por, unë e kuptoj se duhet t’i mbushni gazetat dhe e respektoj këtë. Kur nuk fiton ndeshje atëherë nisin edhe tregimet e sajuara dhe ne duhet ta pranojmë këtë,” ka shtuar ndër të tjera Wenger.

Arsenal u mposht 3-1 nga Liverpooli në kuadër të Premier Ligës, ndërsa tash është duke u bërë gati për ndeshjen e Ligës së Kampionëve ndaj Bayernit.

Ndeshjen e parë, Bayern e fitoi 5-1. Djelmoshat e Wengerit duhet të fitojnë 4-0 nesër mbrëma për të kaluar në çerekfinale të Ligës së Kampionëve.