Zekolli e Jakupi, emërohen nënkryetarë të Bordit Drejtues

Skuadra e Prishtinës që sonte del përballë Pejës në parket për të kërkuar gjysmëfinalen e PlayOffit, gjatë ditës ka bërë të ditur që ka emëruar dy nënkryetarë në Bordin Drejtues të klubit.

Bardhekaltërit me propozim të kryetarit Burim Maraj kanë votuar Ferid Zekollin dhe Shkumbin Jakupin, ndërsa klubi beson që do të përfitojë nga përvoja e tyre.

Zekolli, një legjendë e basketbollit dhe ish drejtues në Federatë si dhe Jakupi, një ish-basketbollist dhe ndërmarrës i suksesshëm në SHBA, pritet të sjellin risi te KB Sigal Prishtina, është shkruar në njoftimin e klubit sot, lëshuar në llogaritë zyrtare të rrjeteve sociale.

Përndryshe, KB Prishtina ka kaluar njërin ndër stinorët më të vështirë në stinor të rregullt në Superligë, ku në xhiron e fundit u përbirua drejt PlayOffit dhe ishte në rrezik për rënie.

Në anën tjetër, klubi fitoi Kupën e Kosovës në Final 8 të organizuar në Suharekë përgjatë muajit shkurt. Sonte bardhekaltërit me fitore potenciale vazhdojnë garat në PlayOff, ndërsa me humbje, do të mbyllin stinorin.