KUPA E KOSOVËS / ÇEREKFINALET
Zëvendësuesit kualifikojnë Llapin në gjysmëfinale
16 March, 2022 @17:03
Fituesi aktual i Kupës së Kosovës, Llapi, e mposhti Gjilanin me rezultat 2-0 [Drilon Fazliu 85’, Alef Firmino 90+1’] dhe u kualifikua në gjysmëfinale të Kupës.
Llapi në minutat shtesë të pjesës së parë shënoi një gol me Alban Shillovën, por goli i tij u anulua pas rishikimit të VAR-si, ku gjatë harkimit nga korneri topi kishte dalur jashtë vijave të fushës.
Në pjesën e dytë trajneri i Llapit, Tahir Batatina, inkuadroi në fushë Drilon Fazliun dhe Alef Firminon. Këta dy ishin vendimtar në fitoren e skuadrës nga Podujeva.
Fazliu shënoi në minutën e 85’ të ndeshjes, derisa Firmino dështoi nga penalltia në minutën e 88’, kurse shënoi në minutat shtesë të ndeshjes pas asistimit të Valmir Veliut.
Llapi me këtë fitore kualifikohet në gjysmëfinale të Kupës.
