2 futbollistët e Kosovës në lojë, por Schalke nis me humbje

Schalke që drejtohet nga trajneri grek Dimitrios Grammozis përkundër se ka qenë në epërsi të hershme, është mposhtur me përmbysje nga Hamburgu në ditën e hapjes së sezonit të ri në Bundesliga 2.

Schalke është mposhtur 1-3 nga Hamburgu mbrëmë për të nisur kështu me humbje stinorin, ndërsa të dy kosovarët e ekipit nga Gelsenkirchen kanë pasur minuta të bollshme në lojë.

Ka qenë së pari Blendi Idrizi që është futur në lojë në minutën e 32 të ndeshjes pas lëndimit të Danny Latzas, ndërsa në 18 minutat e fundit të lojës në fushë ka qenë edhe Bleron Krasniqi që ka zëvendësuar Dominick Drexlerin.

Idrizi 23-vjeç që luan si mesfushor ka qenë solid në përballje, ndërsa Kransiqi 19-vjeç pa tentimin e tij të fortë të pritur nga portieri mysafir në minutën e parafundit të ndeshjes.

Gjithsesi vetë paraqitja në ekip të Schalkes është me rëndësi për dyshen, ndërsa pas xhiros së parë tash pritet të shihet edhe më tepër ndikimi i tyre në ekip.

Në anën tjetër reprezentuesit të Shqipërisë, Klaus Gjasula, nuk iu besua asnjë minutë nga trajneri i Hamburgut.