5.7 milionë € për stadiumin e Prishtinës

Qyteti i Prishtinës shumë shpejtë pritet të ketë një stadium modern.

Këtë e ka konfirmuar sot edhe ministri i Ministrisë për Kulturë, Rini dhe Sport, Kujtim Shala, i cili ka pasur sot një takim me drejtuesit e klubit të Prishtinës, përkatësisht nënkryetarin Afrim Muçiqi dhe drejtorin e përgjithshëm, Sokol Krasniqi.

“Sot në takim me zyrtarët e FC Prishtina, i informova me ecurinë e procedurave të tenderimit në investimin që do të bëjmë sëbashku me komunën e Prishtinës në stadiumin e qytetit. Sot do të hapim ofertat dhe ftova përfaqësuesit e klubit të jenë të pranishëm. Ky do të jetë investimi më i rëndësishëm i sportit nga Qeveria prej 5.7 milionë eurosh. Sipas projektit ideor, do të jetë një objekt modern dhe i përshtatshëm. Punimet e këtij ndërtimi do të mbikëqyrim sëbashku me ne Ministrinë gjegjëse, edhe Komuna e Prishtinës, FC Prishtina dhe Federata e futbollit të Kosovës,” tha ministri Shala pas takimit, shkruan faqja zyrtare e klubit bardhekaltër.

Ndërsa në anën tjetër, nënkryetari Muçiqi, duke qenë falenderues për këtë iniciativë, tha se përveç kësaj, për Prishtinën një kërkesë jetike është edhe fusha ndihmëse.

“I tërë klubi dhe adhuruesit jo vetëm të Prishtinës, u janë falënderues ministrit Shala për punën e shkëlqyer për, ndoshta, investimin më të madh që do të bëhet në sport, e sidomos e falënderoj për transparencën e madhe. Kjo duke ndryshe, sepse prej të kaluarës, projektet janë bërë vetëm në letër pa u punuar asgjë në praktikë. Por, ndër disa kërkesa që patën në takim, ajo që duhet potencuar, është fusha ndihmëse që për ne, dhe jo vetëm, është jetike.”

Sipas projektit për investime te stadiumi i qytetit në Prishtinë, 75% i shpenzimeve do të mbulohet nga Qeveria, ndërsa 25% nga Komuna e Prishtinës.