Arpagjik’t vetëm kuqezi!

Arpagjik’t kanë reaguar ndaj njoftimit të Federatës së Futbollit të Kosovës, ku thuhej se disa grupe të tifozerive, përfshirë këtu edhe Arpagjik’t, do ta përkrahin përfaqësuesen e Kosovës më 5 mars në ndeshjen kundër Haitit nën emrin ‘Dardanët’.

Tifozët nga qyteti i Prizrenit e kanë demantuar këtë lajm me anë të një njoftimi për media.

“Grupi i tifozëve Arpagjik’t do t’i mbeten besnik gjithmonë kombëtares Kuq e Zi. Sot në mbledhjen e mbajtur në selinë e FFK-së edhe lideri i Arpagjikëve pas thirrjes së drejtuar në shenjë respekti ka qenë pjesë e mbledhjes së tifo grupeve dhe haptas është shprehur se ne nuk jemi kundër përfaqësueses së Kosovës, mirëpo nuk do ta përkrahim atë në mënyrë të organizuar,” thuhet në njoftimin e Arpagjikëve.

Kështu, Arpagjik’t janë bashkuar grupit të tifozerive Plisat nga Prishtina dhe Kuqezinjtë e Jakovës nga Gjakova, të cilët më parë ishin deklaruar që nuk do ta përkrahin në mënyrë të organizuar përfaqësuesen e Kosovës.