‘Dardanët’ në përkrahje të Kosovës

Sot më 26 shkurt, kryetari i FFK-së Fadil Vokrri dhe Agron Selmi nga AS-ART&Eevent, mbajtën një takim me përfaqësuesit e grupeve të tifozerive me qëllim edhe ky segment të jetë funksional dhe në përkrahje të përfaqësueses së Kosovës në ndeshjen kundër Haitit që do të zhvillohet më 5 mars në stadiumin Adem Jashari në Mitrovicë, njofton zëdhënësi i FFK-së, Fazli Berisha nëpërmjet një komunikate për shtyp.

Në komunikatë thuhet se kryetari Fadil Vokrri duke i përshëndetur dhe falënderuar të pranishmit për pjesëmarrje, ka theksuar se adhuruesit janë një prej mbështetësve kryesorë të një përfaqësueseje dhe luajnë një rol të madh në suksesin e saj.

“Jam i vetëdijshëm se ka mendime që të kemi vetëm një kombëtare dhe të gjithë do ta dëshironim këtë gjë, por realiteti ynë është ndryshe, sepse Kosova tashmë është shtet me të gjitha atributet, madje për këtë janë sakrifikuar mijëra të reja dhe të rinj së këndejmi edhe ne po bëjmë pjesën tonë të sportit dhe tash kemi një përfaqësuese që do të na përfaqësojë dhe kërkojë nga ju që të jeni unikë dhe në mbështetje të saj të jeni në stadiumin Adem Jashari në Mitrovicë me 5 mars. Unë ju ftojë që t’i leni anash divergjencat që mund të keni ndonjëherë dhe aty të jeni si një trup.”

Në anën tjetër, përfaqësuesit e tifozerive kanë falënderuar kryetarin Vokrri dhe kanë premtuar që aty do të jenë bashkë të gjithë pa dallim të ngjyrave që kanë si grupe të tifozëve.

Torcida, Skifterat, Intelektualët, Ujqit, Shqiponjat, Shqiponjat e Zeza dhe Arpagjik’t, së bashku me emrin ‘Dardanët’

Grupi i tifozëve të cilët do ta përkrahin përfaqësuesen e Kosovës do të quhen ‘Dardanët’. Kështu janë pajtuar të gjithë përfaqësuesit e tifozerive të pranishëm në mbledhjen e sotme.

Në këtë mbledhje ishin të pranishëm përfaqësues nga grupet Torcida (Mitrovicë), Skifterat (Gjilan), Intelektualët (Gjilan), Ujqit (Ferizaj), Shqiponjat (Pejë), Shqiponjat e Zeza (Skenderaj) dhe Arpagjik’t (Prizren).

Këta tifozë do ta përkrahin Kosovën nga pjesa veriore e stadiumit, ku për ta është paraparë çmimi special i biletave prej 3 euro, ndërsa përveç saj, çdo grup i tifozerisë do të ketë edhe nga 20 bileta gratis.