Ballkani e Gjilani në disiplinore

Komisioni Disiplinor i Superligës pas ndeshjeve të xhiros së kaluar të Superligës ka marrë vendim që të fusë në procedurë disiplinore skuadrat e Ballkanit dhe Gjilanit.

Ballkanit i është kërkuar deklaratë shtesë para se të mirret vendimi final, pasi që është regjistruar lëshim në organizimin e ndeshjes Ballkani-Llapi, mos respektim i vendimit të Qeverisë së Kosovës lidhur me masat anti-Covid-19. Fillimi i ndeshjes është vonuar për 23 minuta, ka bërë të ditur disiplinorja.

Gjithashtu, ka pasur sharje e ofendime në kor drejtuar trajnerit të Llapit, Tahir Batatina, si dhe hedhje të shisheve plastike, bazuar në raport të delegatit por edhe në xhirime televizive.

Në anën tjetër, lëshim është regjistruar edhe te Gjilani për shkak të hedhjes së shisheve plastike drejt lojtarëve të Ulpianës në ndeshjen Gjilani-Ulpiana, pasi që në minutën e 54 të ndeshjes gjyqtari kishte akorduar penallti dhe mysafirët kishin shënuar gol, e ofendime gjithashtu kishte pasur në kor në drejtim të mysafirëve.

Po ashtu, është regjistruar në lëshim edhe një simpatizues i Gjilanit që me shufër metali futet në fushë dhe i vërsulet gjyqtarit kryesor të ndeshjes. Ky ishte ndalur nga zyrtari për siguri i ekipit.

Derisa Gjilanit i është kërkuar deklaratë shtesë për incidentet deri në vendimin final, mbetet të shihet se si do të jenë vendimet ndaj skuadrave në fjalë nga KD.