Barazim në Suharekë, Ballkani -2 nga kreu

Pa fitues është mbyllur dueli mes Ballkanit dhe Prishtinës në Suharekë. Therandasit sot kishin mundësinë që të barazoheshin me pikë me Dritën lidere, mirëpo këtë ia mohoi Prishtina, që nuk u largua pa pikë nga Theranda, 2-2 (Blend Baftiu (P) 12’, Kushtrim Gashi 44’ / Endrit Krasniqi 17’, Oto John 60’).

Ndeshja filloi mirë për vendasit, të cilët kaluan në epërsi 1-0 përmes penalltisë së shënuar nga Blend Baftiu (12’). Megjithatë, gëzimi vendas zgjati pak.

Ishte Endrit Krasniqi i Prishtinës ai që shënoi për 1-1 vetëm 5 minuta më vonë (17’). Krasniqi fillimisht e shpërdoroi penalltinë, por për fatin e tij të mirë, topi i pritur nga portieri Ruxhi u kthye përsëri te ai, e nga tentimi i dytë ai u tregua i saktë.

Pak para fundit të pjesës së parë (44’), Kushtrim Gashi i vendasve me një supergol nga distanca bëri që Ballkani të shkonte në pushim mes pjesëve me epësi 2-1.

TABELA AKTUALE

Pjesa e dytë kaloi me vetëm një gol të shënuar.

Ishte sulmuesi Oto John i mysafirëve ai që e gjeti rrjetën në minutën e 60’ të ndeshjes, gol që doli të ishte i mjaftueshëm që Prishtina të largohet me pikë nga Suhareka. Në vazhdim të ndeshjes gola më nuk pati përkundër orvatjeve të skuadrave për shënim dhe kështu ndeshja u mbyll me rezultatin përfundimtar 2-2,

Me Prishtinën që është jashtë garës për titull, Ballkani shpreson në ndeshjen direkte ndaj Dritës në Suharekë, ndeshje që luhet në xhiron e fundit dhe që më shumë gjasë do të jetë vendimtare në përcaktimin e kampionit për këtë sezon.

Kujtojmë që Ballkani e Prishtina do të takohen mes vete në finalen e Kupës së Kosovës. Ajo ndeshje do të luhet më 29 korrik.