Bayern lehtë në finale

Kampioni aktual europian, Bayern Munchen, ka arritur lehtësisht të përballojë pengesën kineze në gjysmëfinale të Kampionatit Botëror të Klubeve që sivjet po mbahet në Maroko të Afrikës Veriore. 

Skuadra e Pep Guardiolës ka qenë disa herë më e mirë se ajo e strategut të famshëm italian, Marcelo Lippi, që po vazhdon karrierën e tij në Kinë. 

Futbollisti më i mirë i Europës për stinorin e shkuar, Franck Ribery ka sjellë epërsinë për Bayernin në minutën e 40-të të ndeshjes, derisa shumë shpejtë Mario Mandzukic (44’) ka ngritur epërsinë në 2-0. 

Nuk ka zgjatur shumë, pas pushimit 15 minutësh edhe mesfushori gjerman, Mario Gotze, ka shënuar në minutën e 47-të të ndeshjes për rezultatin përfundimtar të ndeshjes, përkundër se bavarezët kishin një morri rastesh deri në fund të takimit karshi Guangzhousë. 

Për më tepër, Xherdan Shaqiri është futur në 20 minutat e fundit të ndeshjes për tu bërë shqiptari i parë që merr pjesë dhe paraqitet në fushë në Kampionatin Botëror të Klubeve, garë kjo ku luajnë kampionët e Konfederatave të FIFA-së. 

Shaqiri ka treguar cilësitë e tij në ndeshje duke u aplauduar edhe nga vetë Guardiola për lojën e tij. 

Bayern në finale të Kupës Botërore të Klubeve pret fituesin e gjysmëfinales tjetër që zhvillohet nesër ndërmjet marokenëve të Raja Casablanca dhe Atletico Mineiros braziliane. 

Finalja luhet të shtunën me fillim në ora 20:30.