BESA-DRITA
Besa befason Dritën
27 August, 2017 @18:19
Edhepse ekipi i Valdet Shoshit i rifreskuar thuajse krejtësisht me lojtarë të ri dhe nuk llogaritej favorit para kësaj ndeshjeje karshi Dritës së shumëpërforcuar dhe që vinte me fitore si mysafire ndaj Prishtinës, në fund, Besa ka shënuar fitore impresive 2-0 në Shahin Haxhiislami në Pejë.
Besa avancoi me golin e Altin Merlakut në minutën e 20 të takimit, kur u asistua nga Fetim Kasapi, që ishte edhe rezultati përfundimtar i pjesës së parë.
Por, derisa pritej rikthimi i Dritës në pjesë të dytë me zëvendësime të shumta nga trajneri Milazim Zuzaku, Besa shënoi për të vulosur fitoren.
Ishte zëvendësuesi Liridon Balaj që shënoi në minutën e 55 të takimit për 2-0. Balaj 6 minuta më parë kishte hyrë në ndeshje, për të zëvendësuar Landrit Ramën e lënduar.
Kjo qe fitorja e parë e stinorit për Besën, ndërsa Drita që tash mbetet një hap prapa Llapit që kryeson i vetmuar për momentin në Superligë.
