Blatter dorëhiqet nga FIFA

Kreu i shtëpisë botërore të futbollit, Sepp Blatter, ka thënë se do të japë dorëheqje nga posti i tij, për shkak të skandalit me korrupcion në FIFA dhe arrestimit të disa zyrtarëve të lartë aty. 

Në njoftimin e tij, Blatter 79 vjeçar, ka bërë të ditur gjithashtu të thirret Kongresi i jashtëzakonshëm i FIFA-së, sa më shpejtë të jetë e mundur për të zgjedhur kryetarin e ri. 

“Edhe pse anëtarët e FIFA-së më dhanë mandatin e ri, ky mandat duket se nuk po përkrahet nga çdokush në botë. Për këtë thërras Kongeres të jashtëzakonshëm për të zgjedhur kryetarin e ri me zgjedhje të reja,” ka thënë Blatter, transmeton BBC. 

Blatter, 4 ditë më parë u zgjodh për herë të pestë radhazi kryetar i FIFA-së.

Deri në zgjedhjen e kreut të ri, Blatter do të kryejë detyrën e kryetarit.

Zvicerani Blatter është në detyrën e kryetarit të FIFA-së për 16 vjet radhazi, pasi që ka zëvendësuar në këtë post brazilianin Joao Avelange.