JOVETIC
Blejeni ose e shitëm tjetërkund!
10 July, 2013 @8:44
Sulmuesi i përfolur për largim të mundshëm nga Fiorentina, Stevan Jovetic, ende nuk dihet se ku do të përfundojë deri në fund të afatit kalimtar.
Përkundër kërkesave dhe përfoljeve të ndryshme, kreu i Fiorentinës mbrëmë doli me deklaratë që i ka tërhequr vërejtjen Juventusit.
“Na jepni 30 milionë euro të gatshme dhe e tëra është kjo. Përndryshe, do t’ia japim ndonjë skuadre tjetër,” i është drejtuar ai krerëve të kampionit nga Mediaset Premium TV.
“Ne nuk do të presim më. Duhet të qartësohet, a ka Juventusi para apo jo. Mendoj se kanë. Por, nuk do të pranojë asnjë marrëveshje tjetër përveç blerjes së pastër të lojtarit,” citohet të ketë thënë më tej Andrea Della Valle.
Përveç Juventusit, Joveticin është duke e kërkuar edhe Manchester City. Mediat italiane mendojnë se ky presion i Della Valles vjen nga kërkesa e Manchester Cityt, pasi që lojtari dëshiron të luaj për Juventusin dhe me një presion të tillë do t’i japin bianconerëve afat për vendimmarrje. Ndërsa në momentin që Juventus do t’i thotë jo-në definitve Joveticit, në skenë do të dalë nënkampioni i Anglisë.