Brazilianët, për epilogun e trajnerëve argjentinas

Skuadra e Barcelonës është dashur të luftojë për të shënuar golin e barazimit si vendas, pasi që Atletico Madrid kishte marrë epërsinë me një gol mjeshtëror të brazilianit Diego. 

E këtë e ka arritur përmes brazilianit Neymar, që është gjendur në vendin e duhur dhe në momentin e duhur pas një asistimi milimetrik të Andres Iniestës për të shënuar në portën e Thibaut Courtoisit të hatashëm. 

Courtoise ka qenë fantastik duke mbrojtur pastaj edhe disa goditje të katalonasve, derisa Atletico Madrid nuk ka qenë pa raste duke i bërë ballë në të gjitha pjesët e fushës Barcelonës. 

Ndoshta ndeshja do të mund të mirrte edhe kahje krejt tjetër, po të mos detyrohej që heret në ndeshje të largohet nga fusha sulmuesi më i mirë i madrilenëve, Diego Costa, i cili pas një lëndimi ia la vendin në fushë - golashënuesit Diego. 

Tashmë, Barcelona do të duhet të kërkojë golin patjetër në Vicente Calderon nëse e do gjysmëfinalen e shtatë me radhë të Ligës së Kampionëve, derisa ndeshja zhvillohet në javën tjetër.