MAN UTD - BAYERN

REUTERS

Mundësia

1 April, 2014 @14:38

Sot luhet ndeshja e parë çerekfinale e Ligës së Kampionëve në Old Trafford. Takohen dy rivalë të vjetër të futbollit europian, Manchester United dhe Bayern Munchen.

Manchester United s’është aspak ai i vjetri, i viteve të fundit, derisa Bayern Munchen është në formë jetësore, mbrojtës i titullit si dhe posa u rishpall kampion i Bundesligës për këtë stinor.

“Bayern ka qenë ekip shumë i mirë në stinorin e kaluar - ata kanë fituar Ligën e Kampionëve dhe duket se e kërkojnë këtë gjë edhe njëherë. Kanë njërin ndër trajnerët më të mirë në botë. Presion kemi njejtë, të dyja skuadrat. Ne dëshirojmë ta fitojmë ndeshjen, aq sa edhe Bayern,” ka thënë trajneri i Man Utd, Moyes para ndeshjes së sotme me bavarezët në Old Trafford.

Në anën tjetër, trajneri i Bayernit që ka hequr qafe kampionatin gjerman duke e fituar është totalisht i koncentruar për në Ligë të Kampionëve dhe dëshiron të arrijë atë që nuk është arritur në 20 vitet e fundit - të fitohet Liga e Kampionëve nga një ekip dy herë radhazi.

“Manchester United është njëri ndër klubet më të rëndësishme në botë, pa marrë parasysh situatën ku gjinden tash. Ata kanë lojtarë të mirë. Për herë të fundit kam qenë në Manchester 20 vjet më parë, shpresoj në performancë të mirë të ekipit tim,” ka qenë i kujdesshëm Pep Guardiola në deklaratat e tij.

Manchester United ka arritur që të dalë në çerekfinale të Ligës së Kampionëve duke e eliminuar Olympiacosin me performancë të mrekullueshme të Robin Van Persie në ndeshjen e kthimit, derisa Bayern Munchen ka eliminuar Arsenalin, duke kryer punë që në ndeshjen e parë në Londër.