City, ndër më të mirët në botë

Në konferencën për shtyp para ndeshjes me Manchester Cityn që luhet nesër mbrëma, trajneri i Barcelonës, Gerardo Martino, e ka cilësuar si ndeshje më të vështirë e së tetës së finales në gjashtë vitet e fundit. 

“Gjashtë stinorët e fundit ne kemi qenë në gjysmëfinale dhe tifozët janë mësuar në atë, mirëpo dueli ndaj Cityt do të jetë më i vështiri i kësaj faze krahasuar me ato të gjashtë viteve të fundit,” ka thënë Martino në konferencë për shtyp sot. 

“Ata nuk janë mini-Barcelona, e as mini-askush tjetër, ata janë njëra nga ekipet më të forta në botë për momentin. Ata kanë lojtarë shumë të mirë në çdo pozitë të ardhur nga çdo pjesë e botës. Për Neymarin nuk kam vendosur ende, mund të luaj nga fillimi, por edhe më vonë - me rëndësi është që e kam në dispozicion,” ka përfunduar Martino konferencën për shtyp para ndeshjes. 

Barcelona në Etihad të Manchesterit do të luaj ndaj ekipit të Manuel Pellegrinit, City, që për herë të parë në histori të Ligës së Kampionëve ka arritur në këtë fazë të kësaj gare.