Dimër i ngrohtë për kampionin

Përballja e fundit e Superligës për stinorin vjeshtor ndërmjet Ferronikelit dhe Hajvalisë ka përfunduar baraz pa gola, 0-0. 

Me këtë pikë të fituar, Ferronikeli është bërë edhe zyrtarisht kampion vjeshtor me 31 pikë të mbledhura në 17 xhirot e para të stinorit 2015/16 dhe është në rrugë të mirë për të mbrojtur titullin - edhepse aty gjithçka vendoset në pranverë. 

Sa i përket ndeshjes së sotme, Hajvalia ka tentuar më shumë në pjesë të parë për të shënuar, derisa kushtet kanë qenë ideale në “Shahin Haxhiislami” të Pejës e Shkëlqim Pacolli pati rastin më të mirë kur qëlloi shtyllën e portës së Ferronikelit të mbrojtur sot nga Flamur Neziri. 

TABELA AKTUALE E SUPERLIGËS

Sidoqoftë, në pjesë të dytë Ferronikeli me Behar Maliqin në formë të mirë tentoi disa herë për të shënuar, por nuk arriti. 

Në fund, pas tre minutave shtesë të sinjalizuara nga referi kryesor i ndeshjes Fatmir Tahiri, përballja përfundoi pa gola dhe Ferronikeli përfundoi stinorin vjeshtor si kampion, derisa Hajvalia është në rrugë të mirë me rezultatet e arritura gjatë vjeshtës që të tentojë më shumë në pranverë - pse jo edhe titullin e parë në histori të klubit.