ITALIA
REUTERS
Dorëhiqet Prandelli!
25 June, 2014 @10:31
Përzgjedhësi italian, Cesare Prandelli, është ndarë i zhgënjyer nga Kampionati Botëror, Brazili 2014 dhe ka ofruar dorëheqjen e tij.
“Projekti teknik ka dështuar dhe unë e marrë përgjegjësinë. Me 11 futbollistë kemi qenë në lojë, por me 10 ka qenë e pamundur,” ka thënë Prandelli për mediat italiane, njofton La Gazzetta dello Sport, sot.
Italia nuk ka arritur të dalë nga grupet kualifikuese për dy Botërorë me radhë. Ata kanë dështuar edhe në Afrika Jugore 2010, por edhe tash në Brazili 2014 - të kalojnë në të tetën e finales së Botërorit, derisa 8 vite më parë ishin shpallë Kampionë të Botës për herën e katërt në Gjermania 2006.
Mediat italiane kanë pyetur edhe kreun e FIGC (Federatës italiane të futbollit) për vendimin e Prandellit, derisa kryetari Giancarlo Abete ka thënë se kjo do të vendoset në takimin e Bordit të FIGC ku do të kërkojnë që përzgjedhësi të kthejë vendimin e tij mbrapa, pasi që vendi i dytë në EURO 2012, vendi i tretë në Kupë të Konfederatave dhe kualifikimi i lehtë në Brazili 2014 - janë rezultate tejet impresionuese.
