HAJVALIA-TREPÇA'89
Oto John John, lideri i golashënuesve dhe njeriu që po e çon Trepçën'89 drejt titullit të parë në histori/ Foto: prishtinafc.com
E katërta me radhë për liderin
3 March, 2017 @14:34
Trepça’89 po mban fortë kreun e klasifikimit të Superligës, ndërsa sot me fitore rutinore ka kaluar edhe rivalin aktualisht më të dobët në Superligë, Hajvalinë.
Ndeshja nuk nisi mirë fare për liderin. Nxënësit e Zekirija Ramadanit dukej se nuk ishin fort të interesuar për lojë, derisa Hajvalia me talentët e saj krijoi një rast që për pak ishte të befasojë.
Por, në 45 minutëshin e dytë të takimit Trepça’89 u këndell plotësisht dhe shpejt-e-shpejtë kreu punë në Kishnicë.
Lideri i golashënuesve të Superligë, Oto John John hapi serinë e golave, siguroi fitoren pastaj me 0-2 ndërsa Florent Hasani dhe Hasan Hyseni përcaktuan rezultatin duke shënuar për 0-4.
Mitrovicasit me këtë fitore mbajnë hapin duke qenë 6 pikë larg ndjekësit të parë në klasifikim, aktualisht Prishtinës.
