EUROPA LEAGUE
Eliminim dramatik i Lazios
27 February, 2014 @20:58
Skuadra e Lorik Canës dhe Etrit Berishës, Lazio, është eliminuar nga Europa League. Ekipi romak ka barazuar me rezultat 3-3 ndaj Ludogoretsit në Sofie të Bullgarisë, duke dështuar kështu t’i revanshohet humbjes 0-1 që e kishte pësuar në Itali.
Në të vërtetë gjërat filluan mjaft mirë për italianët pasi që në minutën e parë kaluan në epërsi me golin e Keitas, kurse në minutën 54’ Perea e dyfishoi epërsinë.
Më pas erdhën dy gola nga ekipi bullgar, ndërsa realizatorë ishin Bezjak dhe Zlatinski.
Vetëm katër minuta pasi u barazua rezultati në 2-2, sulmuesi gjermano-polak, Miroslav Klose, e kaloi edhe njëherë në epërsi skuadrën e tij për ta heshtur stadiumin Vasil Levski.
Por për festën e madhe në Sofie u përkujdes braziliani Juninho Quixada, i cili shënoi në minutën 88’ dhe kështu ia siguroi kualifikimin e skuadrës së tij për në 1/8 e finales në Europa League.
Trajneri i Lazios, Edy Reja, në këtë ndeshje nuk i dha fare hapësirë dyshes së kombëtares shqiptare, Lorik Cana dhe Etrit Berisha, duke i lënë të harruar në bankën rezerve.
Kundërshtari i ardhshëm i Ludogoretsit do të jetë fituesi i duelit ndërmjet Dynamo Kievit dhe Valencias.
