DERBI I FUNDIT TË TABELËS
Ferizaji del nga fundi, ngujohet Trepça
26 October, 2014 @15:57
Skuadra e Ferizajit është treguar e fuqishme ndaj mitrovicasve sot në stadium si vendas ku ka shënuar fitore me rezultat 3-1.
Me këtë fitore, ferizajasit kanë dalë nga fundi i tabelës dhe tashmë kanë ngujuar pikërisht Trepçën aty.
Agron Istrefi i dha epërsinë Ferizajit me golin e tij në minutën e 13-të të takimit, pasi që shuti i Betim Haxhimusës ishte dëbuar nga portieri Afrim Ademi.
Dhe, pesë minuta më vonë, Dardan Bytyqi, ngriti epërsinë e vendasve në 2-0 për t’ia dhënë një siguri më të madhe atyre.
Trepça nuk arriti të këndellet assesi as në pjesë të dytë, derisa Taulant Rusinovci, pas një topi të marrë nga Mirsad Idrizi që luajti shpejtë gjuajtjen e lirë, vulosi fitoren e vendasve. Krejt në fund, kapiteni i mitrovicasve Shpëtim Babaj, shënoi golin e nderit nga penalltia, për përfundimtaren 3-1.
Ferizaji me fitore del nga fundi i tabelës. Kjo ka qenë fitorja e dytë me radhë e vendasve në Superligë. Në anën tjetër, Trepça, duhet t’i rishikoj gjërat, pasi që tashmë me 9 pikë ngujohet në Superligë.
