Feronikeli fiton me përmbysje

Në njërin nga 2 takimet e ditës së sotme në Superligë, Feronikeli arriti që me përmbysje ta fitojë takimin e luajtur ndaj Besës në shtëpi.

Pjesa e parë kaloi me dominimin e ‘Niklit’, mirëpo goli nuk erdhi në asnjë moment, duke bërë kështu që skuadrat të shkojnë në pushim me rezultat të bardhë.

TABELA AKTUALE SUPERLIGA

Të parët në epërsi kaluan mysafirët nga Peja me golin e Altin Merlakut. Merlaku shfrytëzoi një krosim nga Qorraj dhe shënoi me kokë për 0-1, kurse rikthimi i Feronikelit ndodhi në vazhdim të lojës. Fillimisht, për 1-1 shënoi Granit Arifaj me një goditje zhagazi nga distanca, kurse për golin e fitores u përkujdes Qemajl Elshani, i rikthyeri pikërisht nga Besa te klubi nga Drenasi. Elshani golin e gjeti nga një pozicion tejet i dyshimtë për pozitë jashtë loje. Një top i ardhur nga koka e Behar Maliqit, i cili tentoi të shënonte pas krosimit të Mark Milicajt nga rivënja këndore, e gjeti më së miri në zonë Elshanin, i cili shënoi për 2-1 dhe ia siguroj fitoren skuadrës së tij.

Pas 3 xhirove, Feronikeli ka 7 pikë dhe momentalisht ndodhet në vendin e parë bashkë me Llapin, kurse për Besën kjo është humbja e dytë nga 3 duelet e para sivjet.