CHAMPIONS

Ëmbëlsirat në një furrë të Dortmundit, ku shkruan fitore, fituesi, etj./REUTERS/Ina Fassbender

Finalja e vitit

24 May, 2013 @11:12

Futbollisti i përfaqësueses gjermane, Ilkay Gundogan, do të jetë vital për shpresat e Borussia Dortmundit në finale të Ligës së Kampionëve, që luhet nesër në Wembley të Londrës.

Bayern shihet si favorit i madh në finalen gjermane të Europës, veçanërisht pas shkatërrimit të Barcelonës në gjysmëfinale me rezultat të përgjithshëm 7-0.

Nëse ndaj mesfushës së Barcelonës që përmban emra si Xavi Hernandez, Andres Iniesta dhe Sergio Busquets, Bayern ka arritur të mos pranojë gol në 180 minuta lojë - atëherë skuadra nga Dortmund do t’i ketë punët edhe më vështirë.

Dyshja e qendrës së mesfushës, Bastian Schweinsteiger dhe Javi Martinez, ishin shumë të fuqishëm në luftën e mesit të fushës, prandaj triumfi i bavarezëve u duk tejet i lehtë ndaj katalonasve.

Të dyja ekipet pritet të luajnë me formacion të ngjajshëm, 4-2-3-1, prandaj lufta e mesit të fushës konsiderohet të jetë beteja kryesore që do të sjellë fituesin e ndeshjes.

Me Schweinsteigerin dhe Martinezin në mes, duke ditur cilësitë e tyre të larta dhe pasimet jashtëzakonisht të sakta, Dortmund do të duhet që të ketë Gundoganin në formë të lartë për të pasur gjasa triumfi, ashtu që t’ia shkaktojnë humbjen e tretë në finale Bayernit në katër stinorët e fundit.

Gundogan që pritet të luaj në mes bashkë me Sven Bender, konsiderohet si njëri ndër futbollistët me pasime më të sakta në ekip nga trajneri Jurgen Klopp.

“E kemi marrë në maj të vitit 2011 dhe ai shumë shpejt u shndërrua në strategjist të ekipit. Kjo është gjë e jashtëzakonshme, s’ka shumë lojtarë që do të mund të arrinin këtë në këtë kohë të shkurtër,” është cituar të ketë thënë Klopp për faqen zyrtare të UEFA-së.

“Shumë futbollistë mund të luajnë në hapësira të vogla. Mund të pasojnë, të luajnë shpejtë nga pozita dhe të bëjnë gjëra të mëdha për ekipin e tyre, por Gundogan ka edhe diçka më shumë - ai ka sy për situatë dhe sipas asaj vepron, vizioni i tillë e bën atë të jashtëzakonshëm.”

Në anën tjetër te bavarezët, trajneri Juup Heynckes, është i sigurt se skuadra e tij nuk do të ketë probleme ndaj Dortmundit dhe beson se trofeun do ta ngris Bayern.

Prej se Dortmundi e fitoi finalen e vjetshme të Kupës duke e mposhtur Bayernin 5-2, në katër ndeshjet e radhës të këtij stinori, Bayern ka shënuar dy fitore dhe dy barazime duke mos pasur asnjë humbje ndaj ekipit nga Westfalen.

Nëse Bayern arrin fitoren, kosovari Xherdan Shaqiri, i cili është pjesë e skuadrës bavareze do të bëhet shqiptari i parë që arrin të fitojë titullin e Ligës së Kampionëve në futboll. Shaqiri është duke e përjetuar stinorin e tij të parë në Bayern.