DORTMUND - MONACO

Fitore e madhe, Monaco i afrohet gjysmëfinales

12 April, 2017 @20:36

Takimi që u desh të luhej mbrëmë, por që u detyrua të shtyhej për sot për shkak të eksplodimit në autobusin e Dortmundit, u mbyll me fitoren e francezëve.

Ashtu siç pritej duke marrë parasysh sulmet e frikshme të të dyja skuadrave, ndeshja dhuroi plot 5 gola.

Pjesa e parë u mbyll me rezultat 0-2. Golin e parë për francezët e shënoi supertalenti Mbappe, ndërsa shumë pak para golit, Fabinho e shpërdoroi një penallti, rast i cili mund ta bënte edhe më të thellë epërsinë e Monacos. Pak para mbylljes së pjesës së parë, Monaco e gjeti edhe një herë golin. Kësaj radhe ishte Bender i vendasve ai që shënoi në portën e gabuar, duke bërë që skuadra e tij të kalonte në disavantazh të dyfishtë.

Në pjesën e dytë, Dortmundi fillimisht e zvogëloi disavantazhin me golin e talentit Dembele, mirëpo francezët reaguan shpejt, me Mbappen që shënoi për 1-3, duke bërë kështu që ndeshja në një mënyrë të bëhet një duel mes talentëve që po mahnisin botën, Dembeles e Mbappes. Për Mbappen, ky ishte goli i 20 në 20 ndeshjet që ka startuar.

Gjithsesi, 10 minuta para fundit, Dortmundi e ngushtoi epërsinë përmes japonezit Shinji Kagawa dhe ndeshja u mbyll me shifrat 2-3, rezultat ky i cili e afron dukshëm Monacon me gjysmëfinalen, kur dihet që ndeshja kthyese luhet në principatë pas 1 jave.

Duhet përmendur që kjo ishte humbja e parë e Dortmundit në shtëpi sa i përket garave evropiane që nga dhjetori i vitit 2015.