Gabimet përmirësohen

Pas nisjes së keqe të stinorit në Premier League të Arsenalit, kur humbën nga Aston Villa në shtëpi, ‘Topçinjtë’ janë kundërpërgjigjur në mënyrë fantastike kundërshtarëve në ligë duke dalë në vendin e parë. 

Sidoqoftë, përkundër këtij suksesi, pytjet se a do të mund t’i bëj ballë Arsenali ndeshjeve në të gjitha garat dhe ndaj ekipeve të mëdha kanë mbetur në dyshim. 

E kjo ra në sy mbrëmë, kur Arsenal u mposht nga një ekip i dytë i Chelseat 2-0 në Emirates. Arsenali humbi edhe nga Borussia Dortmund në mesjavën e kaluar në kuadër të Ligës së Kampionëve në shtëpi. 

“Të mos japim konkludime të shpejta,” ka thënë Wenger pas ndeshjes, transmetojnë mediat angleze sot. 

“Nëse i mbledhim të gjitha pikët që nga 1 janari, më duket se kemi mbledhur më shumë pikë sesa çdo ekip tjetër. Sa më shumë të kalojë koha, do të shihni cilësi më të lartë të ekipit krahasuar me ndeshjet e fundit në shtëpi,” ka shtuar françezi, që me ikjen e Sir Alex Fergusonit në pension, është trajneri më në moshë në Premier League. 

“Natyrisht që është e vështirë të pranohet ajo çka na ndodhi në dy ndeshjet e fundit në Emirates, por gabimet janë për tu përmirësuar. Ne do të vazhdojmë të luajmë lojën tonë, ndërsa në ndërkohë do t’i eliminojmë gabimet, do t’i nxjerrim ato jashtë sistemit,” ka thënë tutje Wenger. 

Dyshja spanjolle e Chelseat, Cesar Azpilicueta dhe Juan Mata, që nuk gjejnë vend në formacionin bazë të ndeshjeve të Premier League të Jose Mourinhos kanë shënuar në fitoren e të kaltërve të Londrës në League Cup ndaj Arsenalit. 

E në anën tjetër, Jose Mourinho, ka thënë se Chelsea tashmë është bërë ekip që do të konkurrojë në të katër frontet për tituj, pas fitores së mbrëmshme ndaj Arsenalit. Chelsea mposhti në fundjavë Manchester Cityn në derbi të javës së Premier League dhe ka kaluar në vendin e dytë të tabelës.