SHQIPET NË ZVICËR
Gashi shënon, Nushi skuqet
16 February, 2014 @17:21
Dueli tjetër sot i futbollistëve shqiptarë në Superligën e Zvicrës, përveç asaj ndërmjet Zurichut dhe Thunit, ishte edhe përballja ndërmjet St. Gallen dhe Grasshopper.
Ekipi i Shkelzen Gashit, Amir Abrashit dhe Imran Bunjakut, Grasshopper, e mposhti me rezultat të thellë 5-1 St. Gallenin e Emir Lenjanit, Kristian Nushit dhe Muhamed Demirit.
Ndeshja më së miri kaloi për Shkelzen Gashin, i cili shënoi golin e pestë të skuadrës së tij në minutën e 90’, derisa Kristian Nushi nuk e kishte ditën e tij pasi që vetëm dymbëdhjetë minuta pasi u inkuadrua në lojë gjatë pjesës së dytë, u ndëshkua me karton të kuq dhe u përjashtua nga loja.
Bunjaku dhe Demiri të cilët ishin në bankën rezerve nuk u inkuadruan fare në lojë, derisa Abrashi dhe Lenjani ishin titullarë në skuadrat e tyre.
Me këtë fitore Grasshopper vazhdon ta mbaj hapin ndaj liderit Basel, duke qenë gjashtë pikë larg me 36 pikë të tubuara, derisa St. Gallen ka rënë në pozitën e gjashtë me 30 pikë.
