Hapet stadiumi me fitore

“Përparim Thaqi” u ka hapur sot dyert publikut prizrenas. Stadiumi i shtruar me bar sintetik i ka bërë konak ekipit të vetë pas muajsh të tërë mysafirllëku në vende tjera, e Liria si vendase tamam, ka pritur Istogun që lufton për ngjitje në vend të parë. 

Por shtroja e re ka ndikuar pozitivisht te vendasit në Prizren të cilët ishin të motivuar për fitore dhe para publikut vendas që kishte ardhur në numër të madh, nxënësit e Erdogan Celinës arritën fitore të madhe ndaj istogasve 1-0.

Golin e vetëm në ndeshje e shënoi Fitim Krusha, pas një penalltie të akorduar nga gjyqtari i takimit në fillim të pjesës së dytë. 

Me këtë fitore, Liria është ngritur në pozitën e tetë të Ligës së Parë me 22 pikë të tubuara, derisa Istogu është ndalë në vendin e dytë, e Vëllaznimi (33) që sot mund të festojë përfundimin e stinorin vjeshtor si lider i Ligës së Parë, pasi që ka një pikë më tepër dhe një ndeshje më pak sesa Istogu (32).