Holanda e nis me humbje

Forca numër tre e Botërorit të sivjetëm që u mbajt në Brazil, Holanda, ka filluar në mënyrë të keq eliminatoret për EURO 2016.

Pas humbjes në miqësore ditë më parë ndaj Italisë, tulipanët kanë pësuar edhe humbjen e dytë me trajnerin e tyre të ri, Guus Hiddink, duke u mposhtur kësaj radhe nga Republika Çeke me rezultat 2-1.

Çekët ishin të parët që kaluan në epërsi me golin e mesfushorit të Sparta Pragas, Borek Dockal, derisa më pas Stefan de Vrij e barazoi rezultatin në 1-1.

Kur të gjithë prisnin se ndeshja do të përfundojë me këtë rezultat, në skenë doli zëvendësuesi Vaclav Pilar, që shënoi në minutën e parë të lojës shtesë për t’ia siguruar fillim të mbarë ekipit të tij.

Në ndeshjet e radhës të grupit që luhen në tetor, Holanda do të takohet me Kazakistanin në shtëpi, kurse Republika Çeke do të jetë mysafire e Turqisë, e cila u befasua në ndeshjen e parë nga Islanda.