BLEDI SHKËMBI
I kënaqur me lojtarët, për ndërprerje mos më pyetni
24 February, 2021 @16:17
Trajneri i liderit të Superligës, Bledi Shkëmbi, pas barazimit të sotëm si mysafir i Gjilanit ka thënë se është i kënaqur nga futbollistët dhe angazhimi i tyre në lojë.
Ai pas ndeshjes ka thënë se fitorja në këtë terren ka qenë e pamundur, jo vetëm për Ballkanin, por edhe për vendasit.
“Ishte një ndeshje e luftuar me dy skuadrat që kishin dëshirën për të luajtur. Për ndërprerjet mos më pyetni mua, por arbitrat sepse ata e gjykojnë ndeshjen. Unë jam i kënaqur me futbollistët e mi, pasi që treguan angazhim dhe dëshirë për të fituar, por në këtë terren ishte thuajse e pamundur, jo vetëm për skuadrën tonë, por edhe për skuadrën kundërshtare,” ka thënë korçari Shkëmbi, ndër të tjera pas ndeshjes.
Përkundër barazimit të sotëm, Ballkani mbetet lider i Superligës. Këtë arritje Ballkani e bëri në xhiron e kaluar me fitore në shtëpi, ndërsa sot me barazim, atyre iu afrua Prishtina, ndërsa Drita si ndjekëse e parë është 1 pikë larg.
“Pika do të na shërbejë në vazhdim të kampionatit, ndërsa pozita e parë ka rëndësi vetëm pas ndeshjes së fundit të stinorit, pasi që tash pak ka rëndësi kush është i pari në renditje,” ka shtuar ai.