GJILANI - BALLKANI
Baraz në Gjilan, Ballkani kryeson i vetëm
24 February, 2021 @15:01
Me barazim 1-1 (Darko Nikaç 79’ / Mevlan Zeka 76’) është mbyllur dueli i sotëm mes Gjilanit dhe Ballkanit.
Skuadra vendase që ende nuk di për fitore këtë pranverë arriti që ta ndalë në barazim liderin aktual të Superligës, i cili megjithatë tashmë kryeson i vetëm, pasi që Drita u mposht sot nga Prishtina në kryeqytet.
Përkundër rasteve për shënim në të dyja anët, skuadrat në pushim shkuan me barazim pa gola.
E pjesa e dytë ishte mjaft interesante dhe dhuroi 2 gola.
I pari që shënoi ishte gjakovari Mevlan Zeke i mysafirëve. Në minutën e 76’ Zeka ia dha Ballkanit epërsinë duke shënuar nga gjuajtja e lirë, mirëpo festa suharekase zgjati shumë pak.
Darko Nikaç i gjilanasve u kundërpërgjigj menjëherë. Ai shënoi për 1-1 vetëm tre minuta më vonë, për t’i ekuilibruar shifrat.
E në vazhdim të ndeshjes më nuk pati gola dhe pikët u ndanë mes skuadrave.
Me 1 pikë më shumë se Drita, Ballkani tashmë kryeson i vetëm, mirëpo fitorja e sotme e afron Prishtinën edhe më shumë me Ballkanin, me ç‘rast gara për titull duket edhe më e fortë.
Në anën tjetër, Gjilani i Bylbyl Sokolit është i qetë në mesin e tabelës, jashtë garës për titull dhe larg zonës së rrezikshme.