Interi i shpejtë, kalon Veronën

Verona e cila ia nisi xhiros së nëntë mbi Interin, është mposhtur nga neroazzurrët në Giuseppe Meazza me rezultat 4-2 në fund. 

Këto dy ekipe nuk ishin takuar që nga viti 2001, derisa Verona asnjëherë nuk ka fituar më parë në Milano ndaj Interit. 

Edhe kësaj radhe epilogu ishte i njejtë, kur Inter kaloi shpejtë në epërsi me golin e Jonathanit, i cili çuditërisht mbeti vetëm para portës veroneze për 1-0. Kaltërezinjtë shumë shpejtë dyfishuan epërsinë me anë të argjentinasit Rodrigo Palacio. 

Verona arriti në 2-1, por Estaban Cambiasso u përkujdes për distancën dygolëshe para pushimit 15 minutësh. Me të hyrë në pjesën e dytë edhe mbrojtësi Rolando shënoi për 4-1, derisa Verona vetëm arriti të shënojë edhe golin e dytë - që në fund ka dalë të jetë rezultati përfundimtar i ndeshjes. 

Në fund të ndeshjes, greku i Veronës, Vagelis Moras dhe algjeriani i Interit, Ishak Belfodil u përjashtuan me të kuqe për shkak të një grindjeje. 

Kjo ka qenë fitorja e pestë e Interit në këtë stinor dhe me fitoren e sontme ata janë ngritur në pozitën e katërt para ndeshjeve të tjera që luhen nesër.