Italianët zbulojnë të ardhmen e Hysajt

Mediat italiane sot kanë bërë të ditur se mbrojtësi i djathtë i kombëtares shqiptare, Elseid Hysaj, është shumë afër ndërrimit të ambientit.

Lojtari i Napolit, pritet të kalojë te Lazio, ka bërë të ditur La Gazzetta dello Sport sot, duke marrë informacione nga agjenti i lojtarit shqiptar, që ka bërë të ditur se ka biseduar me Igli Taren, drejtorin sportiv të Lazios.

Mario Giuffredi ka thënë se Tare i ka kërkuar të mbledhë sa më shumë informata për Hysajn ashtu që të shtjellohen të gjitha mundësitë për kalimin e mbrojtësit shkodran te lazialët.

Shkodrani 27-vjeçar, Hysaj, pritet të jetë një ardhje e mirëpritur te Lazio, pasi që ai do të mund të kalojë pa dëmshpërblim nga Napoli, ngase kontrata e tij me napolitanët e drejtuar nga Gennaro Gattuso merr fund.