KA ia refuzon Llapit edhe ankesën e radhës!

Pas refuzimit të ankesës nga Komisioni për Ankesa - shkalla e parë, Llapi ka marrë edhe refuzimin e radhës, kësaj radhe nga shkalla e dytë e këtij Komisioni!

Për shkak të një gabimi protokolar, Llapi pretendonte ta fitonte ndeshjen ndaj Malishevës me rezultat zyrtar.

Mëposhtë, po e sjellim Vendmin e plotë të Komisionit për Ankesa.

Me datë 18.03.2024 “KF Llapi 1932” ka ushtruar ankesë në procedure të rregullt në shkallën e dytë e FFK-së, gjegjësisht komisionit për ankesa ku janë plotesuar të gjitha kushtet për shqyrtimin e kësaj lënde.
Komisioni për Ankesa – shkalla e dytë, në përbërje Haki Xhemjali kryetar, Sitki Baftiu dhe Remzi Azemi anëtarë, në mbledhjen e mbajtur me datë 21.03.2024 shqyrtoi ankesën e “KF Llapi 1932” me nr Reference 1522/1, ushtruar me datë 18.03.2024 ku atakohet vendimi i komisionit të garave i datës 15.03.2024. Komisioni i ankesave pas shqyrtimit të lëndës duke trajtuar me kujdes të gjitha shkresat dhe aktet normative në fuqi në mënyrë unanime nxjerri këtë:

V E N D I M

Komisioni për Ankesa – shkalla e dytë vërteton se vendimi i komisionit të garave për ndeshjen e zhvilluar me datë 13.03.2024 në mes të KF Malisheva dhe ’’KF Llapi 1932’’ ka qenë i drejtë dhe se ankesa e KF LLapi 1932 hedhet poshtë.

ARSYETIM
Komisioni për ankesa në përbërje të plotë me datë 21.03.2024 ka shqyrtuar me kujdes këtë ankesë, të gjitha shkresat e lëndës, vendimin e komisionit të garave dhe në mbeshtetje të rregullores së garave të FFK ka vërtetuar vendimin e komisionit të garave të datës 15.03.2024, duke e cilësuar si vendim të drejtë i cili mbetet në fuqi.

Në ankesen e ’’KF Llapi 1932’’ atakohet vendimi i komisionit të garave duke u thirrur në nenin 62 të propozicionit të garave i cili përcakton rregullat e përgjithshme dhe afatet kohore në procedimin e ankesave në rrjedhen e pergjithshme të kampionatit. Përjashtimisht ketij rregulli kur gjirot zhvillohen të dielen dhe të mërkurën atëherë kompletimi i lëndës së ankesës dhe taksimi i saj duhet të bëhet brenda 24 orëve nga përfundimi i ndeshjes së zhvilluar. Loja në mes të KF Malisheva dhe ’’KF Llapi 1932’’ është zhvilluar ditën e mërkurë të datës 13.03.2024 dhe gjiroja pasuese në kuadër të kampionatit ka qenë në fundjavë, atëherë për rastin në fjalë duhet zbatuar rregulli i nenit 72, të Rregullorës se garave të FFK-së. Me këtë rast ’’KF Llapi 1932’’ nuk i ka respektuar afatet kohore me rastin e procedimit të taksimit për këtë lendë dhe me të drejtë ankesa është cilësuar e pa afatshme. Duke u bazuar në të gjitha faktet referuar më lart vlerësohet se vendimi i shkallës së parë është drejtë dhe në perputhje me aktet normative të FFK-së.

Komisioni për Ankesa – shkalla e dytë, mori këtë vendim bazuar në nenin 120 pika A të Rregullores Disiplinore.

Këshilla Juridike: Pala e pakënaqur në këtë vendim ka të drejtë ankese drejtuar Komitetit Ekzekutiv të Federatës së Futbollit të Kosovës në mbrojtje të Rregullores (ligjshmërisë në afatin kohor prej tetë ditëve nga publikimi i vendimit në web faqen zyrtare të FFK-së).

Prishtinë: Datë: 21.03.2024
Haki Xhemajli, kryetar.◼

Llapi në javën e kaluar ishte ankuar te KG i FFK-së për rastin Rilind Haziraj, ku sipas ekipit të drejtuar nga Tahir Batatina, kishte parregullësi në paraqitjen e futbollistit me Nr. 99 të Malishevës, Rilind Haziraj.

Në fakt, asnjë Komision i FFK-së nuk e shqyrtoi ankesën e Llapit, pasi që, që prej shkallës së parë ata refuzonin ankesën për shkak të vonesës së Llapit për ankim për rastin në fjalë.

KG-ja ditë më parë shkroi:

Komisioni i Garave i FFK-së, në mbledhjen e vetë të mbajtur me date: 15.03.2024, duke vendosur lidhur me regjistrimin e ndeshjeve të javës së 25-të të Albi–Mall Superligës së Kosovës, si dhe të ankesës së ushtruar nga KF Llapi, lidhur me pa rregullsinë e paraqitjes së lojtarit të KF Malisheva, me nr.fanele 99 Rilind Haziraj, ID 001027M99, Komisioni i Garave si organ i autorizuar dhe kompetent, Konform Nenit 71. të Rregullores së garave, me date: 15.03.2024 mori këtë:

V E N D I M

Ankesa e KF Llapi hudhet poshtë si e pa afatshme dhe ndeshja e javës së 25-të, në mes të KF Malisheva – KF Llapi, regjistrohet me rezultatin e arritur në fushë 2:1 në favor të KF Malisheva.

A r s y e t i m

Komisioni i Garave në seancën e vet të mbajtur me datë 15.03.2024, regjistroi ndeshjet e javës së 25-të Albi Mall Superligës së Kosovës me rezultat të arritura në fushë, përveq ndeshjes KF.Malisheva KF-Llapi, e cila pas shqyrtimit të ankesës të KF-Llapi, të ushtruar me datën 14.03.2024 dhe të taksuar-paguar me datën 15.03.2024, e hudh poshtë sit ë pa afatshme ankesën.

Komisioni i Garave gjatë administrimit të ankesës dhe të gjitha shkresave në lëndë u konstatua se për Komisionin e Garave, sipas Nenit 72, Paragrafi 2, të Regullorës së Garave për shqyrtim dhe vendim marrje, dhe: (Kur gjirot zhvillohet të dielen dhe të mërkuren, atëher, kompletimi i lëndës së ankesës dhe taksimi-pagesa, duhet të bëhet Brenda 24 orëve nga përfundimi i ndeshsjes së zhvilluar).

Pasi që ankesa e KF-Llapi është ushtruar me datën 14.03.2024, kurse e taksuar-paguar me datën 15.03.2024, ndërsa ndeshja është zhvilluar me datën 13.03.2024, kështu që nuk është përmbushur neni 72, paragrafi 2 i rregullores së garave, prandaj: Ankesa e KF-Llapi hudhet posht si e pa afatshme dhe ndeshja e javës së 25-të KF Malisheva – KF Llapi, regjistrohet me rezultatin e arritur në fushë 2:1 në favor të KF Malisheva.

Nga theksimet e lartëshenuara u vendos si në dispozitiv të këti vendimi.

Këshillë juridike: Kundër këtij vendimi, pala e pa kënaqur mund të paraqes ankesë Komisonit të Apelit të FFK-ës shkalla e dytë, në afat prej 3 ditësh nga publikimi i këtij vendimi në faqen zyrtare të FFK-së apo datës të dërgimit ne e-mailin zyrtar të klubit.

Kryetari i Komisionit të Garave
Abdyl Bellopoja. ◼

Pas refuzimit nga KG-ja, Llapi kishte reaguar kështu në faqen zyrtare të ekipit në Facebook.

Reagim ndaj Vendimit të KG:

Me rastin e ankesës së paraqitur, në lidhje me parregullsinë e kartonëve të Rilind Hazirajt, në ndeshjen e luajtur më 13.03.2024 Malisheva-Llapi, KG ka refuzuar ankesën tonë me pretendim të paafatshmërisë. Kjo nuk qëndron pasi jemi bazuar në Nenin 62 të PG, ku thuhet: Arsyetimin përkatës duhet dorëzuar më së largu 48 orë pas përfundimit të ndeshjes Komisionit Organizativ të Garave të rangut përkatës. Krahas ankesës bashkangjitni edhe fletëpagesën e taksës prej 100 euro.
Ne kemi dorëzuar arsyetimin në kohë, sipas Nenit 62 të PG (provë, e-maili me arsyetimin e ankesës dhe pagesës, 15.03.2024 12:03). Siç duket KG nga ngutia për të refuzuar ankesën nuk i ka shikuar të gjitha Nenet që përpilohen nga KE i FFK-së. Andaj KF Llapi beson dhe shpreson se ka të drejtë dhe do të ankohet në shkallë të dytë dhe do të ndjek çdo rrugë të mundshme për këtë çështje. ◼