Kallstrom, shënjestra urgjente e Arsenalit

Mesfushori suedez me përvojë, Kim Kallstrom, është shënjestra e fundit e Arsenalit, kanë njoftuar mediat angleze sot. Sipas BBC Sport, 31 vjeçari që luan te Spartaku i Moskës shikohet si punë e kryer për Topçinjtë deri në fund të ditës sot, kur edhe përfundon afati kalimtar. 

Arsenal është goditur nga lëndimi i Jack Wilshere, Aaron Ramsey si dhe suspendimi për tre ndeshje i Matthieu Flamini, kështu që nëse duan të vazhdojnë luftën për titull, përforcimi duhet të jetë i menjëhershëm për të plotësuar zbrazëtirat e krijuara. 

“Jemi duke shikuar mundësinë që të sjellim një futbollist, për shkak të lëndimit të Ramseyt,” kanë qenë fjalët e trajnerit Arsene Wenger, të cituara nga BBC Sport rreth përfoljeve për kalimin e mesfushorit suedez. 

Kallstrom iu bashkua radhëve të Sparakut në vitin 2012 pas 6 viteve të kaluara në Olympique Lyon, ku i zhvilloi mbi 200 ndeshje duke luajtur edhe gjysmëfinalen e Ligës së Kampionëve në vitin 2010. Arsenali mendon ta huazojë atë nga ekipi rus deri në fund të stinorit.