Kampionët!

Kampionët

Spanjollët nuk janë më të mirët që janë ftuar. Dhe me emra si Pedro, Thiago, e Nolito nuk do të duhej të fitohej titulli. Por, nëse shohim se si po ecin gjërat në rrethin e parë në grupe, atëherë pak a shumë jemi të sigurt që dikush si spanjollët mund të bëhet kampion. Shumë taktizime!
Ishin më të mirë se çekët, por jo dominues, ashtu siç pritnim të luaj ndonjë ekip në ndeshjen e parë këtë evropian. Askush nuk luajti lojë bindëse (nejse, polakët deri diku). Ajo çfarë vlen është se kanë tri pikë nga ndeshja e parë dhe gati kalimin e sigurt në rrethin e dytë.
Kanë një qendërmbrojtje prej më të mirave në botë (okej, më e mira pasi Dunga nuk po thirr Thiagon më), një mesfushor që akoma po reziston plakjen dhe po lë në hije të tjerët, dhe një krahë që dje ka shkëlqyer. Këta mjaftojnë për të mposhtur Çekinë me një gol, por gjërat shkojnë duke u vështirësuar!

Martini

Suedia ka Ibrahimovicin! Kaq! Edhe ai nuk ishte në formën më të mirë dje përkundër asistimit tek Clark.
Por, irlandezët ishin më të mirë në fushë, së paku për mendimin tim, edhe pse statistikat mund të tregojnë ndryshe. Gjëja më e mirë që bënë djemtë e Martin O’Neil ishte presioni i herëpashershëm qysh në të tretën suedeze, duke mos u rehatuar në mbrojtje dhe pritur suedezët. Nuk hezitonin të sulmonin, edhe pse Walters e Long do të duhej të kishin bërë më shumë, ngjashëm si Keane. Ishte një lojë më ekipore, me një mesfushë të angazhuar sidomos në ofensivë. Gjynah që humbën dy pikë.

Autobusi

Pas golit të Maradonës, për një orë të tërë italianët si zakonisht vendosën autobusin me tetë lojtarë dhe i lanë kundërsulmeve të kryejnë punën. Mbrojtja ngjeshët me treshen e Juventusit në qendër të cilëve iu bashkëngjitej Darmian e Maradona në krahë, me Rossin e Parolon në qendër, me Candrevan pak më të lirë.

Pelle ofron alternativë të mirë në lojën sulmuese falë shtatlartësisë së tij e nëse ndodh ndonjë kundërsulm, lëshon Ederin apo këtë që të kalëroj lojtarin e parë belg dhe ta ndal nëse duhet edhe me ‘bazooka’. Gjithë çfarë mund të ndodh është një karton i verdhë derisa të rregullohet autobusi përpara portës. Falë mbrojtjes treshe + Pelles loja ajrore është në anën e italianëve. Vetëm koka e Fellainit nuk mund të kryen punë.
E kur provon të luash me Fellainin si 10sh, atëherë personi më i afërt duhet të telefonoj klinikën neuropsikiatrike. Megjithatë Wilmots akoma është trajner i gjeneratës më të mirë në histori të futbollit belg. Gjeneratë që nuk ka lider në fushë, e as lider në bankë. De Bruyne ishte i përgjumur, Lukaku i mbuluar për mrekulli. Kryqëzimet ndërmjet Hazard e De Bruyne do të kishin qenë më profitabile sikur të kishin Carrascon apo Mertensin më herët në fushë. Witsel ishte shumë defensiv, derisa Radja është i tillë. Mbrojtja do të ishte më mirë në treshe pa Ciman, ose së paku me aderweireld në krahun e djathtë. Nejse!
Kjo lojë e Italisë, e mërzitshme, në raste e pistë, me tetë konduktorë autobusi bën kampionin. Është veti e Contes të cilën sigurisht do ta bart tek Chelsea. Do të përshtatet për mrekulli, si në kallëp, pasi ‘blutë’ janë mësuar të parkojnë autobusët aq mirë sa që do të duhej të zëvendësonim D-në me C-në para ‘Stamford Bridge’.

E martë

Veç dy lojë sonte. Austria janë të talentuar – Fuchs, Alaba, dhe evropiano-lindorët. Hungarezët janë të plakur. Xha Kiraly dhe pizhamet e tij legjendare!
Do të jetë interesante sidomos të shohim si do të përballojnë islandezët Cristianon dhe Portugalinë inferiore. Kushdo që zë vendin e parë në këtë grup është e paracaktuar të jetë befasia e këtij kampionati.
Tek e fundit shyqyr që po përfundojnë ndeshjet e para, dhe në ndeshjet e dyta nuk do të ketë më taktizime e frika. Futboll më i hapur. Shpresojmë!