Kosova pushon, rivalët luajnë

Pas miqësores së zhvilluar mbrëmë ndaj Lituanisë, të cilën Kosova e fitoi bindshëm 4-0, sonte Grupin B kualifikues për Botërorin “Katari 2022” e hapin zyrtarisht favoritët e grupit dhe atë në përballjet e tyre si vendas.

Spanja, si favorite numër një për kualifikim drejt Botërorit dhe ish-kampion Botëror pret Greqinë në Granada, me të cilët do të luajnë prej orës 20:45 në stadiumin Los Carmenes.

Të drejtuar nga ish-futbollisti i Real Madridit dhe Barcelonës, Luis Enrique, spanjollët pritet të dalin në fushë me Unai Simon; Porro, Ramos, Martines, Alba; Thiago, Busquets, Canales; Olmo, Morata e Ferran Torres përballë grekëve, ish-kundërshtarit të Kosovës nga Liga C e Kombeve.

Në anën tjetër, Suedia, ekipi tjetër i fuqishëm i grupit pas Spanjës, me rikthimin e Zlatan Ibrahimovicit në kombëtare ka kthyer tërë mediat botërore rreth tyre.

Dueli në Friends Arena të Solnas, pritet t’i takojë suedezëve, përkundër se Gjeorgjia e reformuar tashmë ka edhe përzgjedhësin e ri Willy Sagnol dhe shpreson në befasi.

Kujtojmë, Gjeorgjia ka humbur finalen e PlayOffit të Ligës D të Kombeve nga Maqedonia Veriore në vitin e kaluar — të cilën po ta fitonte do të ishte pjesëmarrëse e EURO 2020.