PLAY-OFF BRAZILI 2014

REUTERS
Kroacia apo Islanda?!
19 November, 2013 @11:01
Sulmuesi kroat, Ivica Olic, ka premtuar që Kroacia do të sulmojë që nga minuta e parë e ndeshjes së sontme ndaj Islandës për të siguruar biletën për në Brazil 2014.
Islanda ka qenë më e mirë në ndeshjen e parë të zhvilluar në Reykjavik, derisa Ólafur Skúlason u ndëshkua me karton të kuq në fillim të pjesës së dytë dhe prej atëherë kroatët filluan dominimin.
“Ne treguam në Islandë që jemi më të mirë, por nuk arritëm të shënojmë. Sidoqoftë, do të jetë një tregim krejt tjetër në Zagreb sonte, e portieri i tyre do të mundohet shumë,” ka kërcënuar sulmuesi i Wolfsburgut, Olic, para ndeshjes.
Pasi që Kroacia ka dështuar të shkojë në KB Afrika e Jugut 2010, tani të gjithë duhet të bëhen bashkë për një qëllim, mendon kapiteni i përfaqësueses, Darijo Srna.
“Duhet të bëhemi bashkë, e gjithë Kroacia për fitore,” ka thënë Srna.
Derisa Kroacia nuk ka probleme me lëndime, islandezët do të ndjejnë mungesën e Kolbeinn Sigthórssonit i cili u lëndua në ndeshjen e parë. Sulmuesi i Ajaxit ishte i zhgënjyer shumë kur morri përgjiigje negative nga mjekët lidhur me ndeshjen e sontme.
Mirëpo përzgjedhësi i përfaqësueses islandeze, Lars Lagerbäck, nuk ka probleme për sulm. Ai e ka të gatshëm 100% edhe sulmuesin më të mirë të ligës holandeze aktualisht. Alfred Finnbogason është golashënuesi më i mirë i Heerenveenit dhe i Eredivisies holandeze.
Për më tepër, Lagerbäck, mund të kërkojë edhe atomin e fundit të energjisë së veteranit me përvojë nga ekipet e mëdha, Eidur Gudjohnsen. E sa për shpresat islandeze sot ka folur ndihmësi i Lagerbäckut, Heimir Hallgrímsson.
“Asnjëherë nuk kanë kaluar dy ndeshje pa shënuar gol kombëtarja jonë. Lojtarët janë të qetë, edhe pse ndeshja është e rëndësisë jetike, pasi që një gjë të tillë ne nuk e kemi shijuar kurrë.”
Islanda do të kualifikohej në Brazil me çfarëdo barazimi me gola, pasi që ndeshja e parë përfundoi 0-0 në Reykjavik. E Kroacisë gjithsesi i duhet fitorja.
SONTE:
20:15, Maksimir, Zagreb | Kroacia-Islanda | (0-0) Rezultati i ndeshjes së parë |